يوميات النكد الزوجي (الحلقة الاولى)

أم الخير

 

بحب كاندي جارتنا مؤدبة بنت ناس طيبين وعارفها وهي لسه في اللفة يعني مضمونة لأ وإيه حلوة وبيضااا ياسلام حلاقي فين واحدة زي دي
مغلوب بيكلم نفسه وبيكمل خلاص حكلم امي تروح تتقدم لها وأهو اكمل نص ديني بقي
مغلوب : ماما انا عايز اطلب إيد كاندي جارتنا

ام مغلوب: يا ابني مالقتش الا بنت النكدية وتخطبها دي امها مخلية عيشة ابوها هباب يابني شوف بنت خالتك مؤدبة ومتدينة
مغلوب : لالالا ياماما دي تخينة وكمان قمحاوية
ام مغلوب : يابني بس ست بيت شاطرة ومتدينة وهادية حتريحك
مغلوب : ياماما انا عايز بنت تعفني عن الحرام ومتخلنيش ابص ولا شمال ولا يمين ولا في السقف
( علي اساس انها فراشة طايرة )
وبصراحة كاندي فيها كل المواصفات دي حتي اسمه زي البنوبون
ام مغلوب : خلاص يا ابني نروح نخطبهالك هو انا عايزة الا سعادتك وراحتك
ام مغلوب اخدت ميعاد من ام كاندي هي وابنها
وبعد يومين
مغلوب وامه قاعدين في الصالون مع ابو كاندي نص ساعة والعروسة وامها مدخلوش ساعه وبردو لسه محدش جه
ام مغلوب بتسأل هي الحاجة ام كاندي فين يا خويا هي تعبانة ولا إيه
ابو كاندي : لا ابد هي بس بتلبس علشان تستقبلكم
ام مغلوب : لا يا اخويا اصلها والمحروسة كاندي اتأخرو اووي
وفيييييييييييييييين ودخلت ام كاندي تسلم ع مغلوب والحاجة امه
وهي بتدور ع حاجة كده وفي الاخر وقعت عنيها عليها وابتسمت ابتسامة صفرا وقالت
ليه بس تعبت نفسك يامغلوب شكرا ياحبيبي والله انا طول عمري اشكر فيك حتي أسأل عمك كده
يبص مغلوب لعمه يلاقيه بيهز راسه بالإيجاب وعلي وشه ابتسامة بلهاء
مغلوب : والله ياطنط انتم ونعم الجيرة
وتكمل ام مغلوب : هي فين العروسة بقالنا اكتر من ساعة ونص ولسه مدخلتش هي بعافية ولا حاجة؟
ام كاندي : لا ياحببتي انت عارفة بقي عروسة وبتتكثف
ام مغلوب وهي بتعوج بقها : بتتكثف جايز
وتقلب وشها وتقول اه ياحببتي جايز بردو مش عيب
والحمد لله وبعد طول انتظار دخلت العروسة والحمد لله في كامل اناقتها وشياكتها وميكاجيها اللي ع اخر صيحة
مغلوب قلبه طار ورفرف علي حظه وقال بينه وبني نفسه
اه لو الجوازة دي تمت ياواد يامغلوب يبقي امك دعيالك بجد ده انت حتبات في هنا وحتصحي في هنا وحتشوف دلع عمر ما حد سمع عنه
ياااااااااااااااااااااه انا خايف احسد نفسي معقول القمر دي حتجوزها
ام مغلوب قطعت احلام مغلوب وقالت والله يا ابو كاندي احنا جايين نطلب ايد بنتك لابني مغلوب وطبعا
احنا جيران وانت عارف ابني
قبل ما ابو كاندي يرد
ام كاندي تقول : اه ياحببتي ده مغلوب بقول انه ادب واخلاق ده احنا يشرفنا واحنا بنشتري راجل ياحببتي
احنا حنلاقي احسن من مغلوب عريس لكاندي
كل ده وكاندي بصه في الارض وطبعا مش قادرة اميز اذا كان اللي في وشها ده حمار الخجل ولا الورنيش اللي دهنا بيه وشها
ما علينا يابشر دعو الخلق للخالق اهم حاجة ان وشها احمر
مغلوب شايفة احمر كسوف يبقي هو كده
يتبع