حقيقة الحوار الذى دار بين رونالدو وميسى بعد الكلاسيكو بالكاااااامل
رونالدو: حظاً أوفر يا ليونيل
ميسي: شكراً لك، كيف حال إصابتك الآن؟
رونالدو: أشعر بتحسن، أنت تعرف، المسألة تحتاج لبعض الوقت
ميسي: تمام تمام .. خلاص كدة فشيت غلك وإرتحت؟
رونالدو: فشيت ايه وغل ايه؟ مالك يابني؟
ميسي: أنا اللي مالي؟ جاي لي بعد الماتش اللي إنت حتى مالعبتوش عشان تشمت فيا؟
رونالدو: وأشمت فيك ليه بس؟ دة أنا جاي أواسيك وأطيب خاطرك
ميسي: مش محتاج شفقة من حد. ومش عشان خسرت ماتش يبقى خلاص محتاج اللي يواسيني. دة أنا معلم عليك مرتين الموسم دة لواحده
رونالدو: أنا مش فاهم إنت مالك يا ميسي، عموماً إنت تلاقيك زعلان من الخسارة ومش عاضغط عليك أكتر من كدة. سلام يا ميسي
ميسي: إسمي كابتن ميسي يا حضرت! لو سمحت ماترفعش التكليف بيننا
رونالدو: لأ دة إنت قليل الأدب وعاوز اللي يربيك بقى! كابتن مين ياض؟! دة
أنا أحسن لاعيب في العالم وكابتنكم كلكم .. قوم أقف ياض وانت بتكلمني!
ميسي: مانا واقف أهو، إنت كمان أعمي؟!
رونالدو: الصراحة إنت شكلك مابيفرقش معايا واقف من قاعد. يالة دة أنا لو كنت إبتديت العط بدري سنة كان …
ميسي: عيد وزيد في الكلام الأهطل بقى! كان ايه؟ كان زمان عندك عيل طولي؟ هاهاهاها .. إضحك يا إينيستا، رونالدو بينكّت
رونالدو: هاهاهاها، لأ فشر، كان زمان إبني أطول منك! أنا برضو عيالي يبقوا طولك يا قزعة!
إينيستا: في ايه بس يا جدعان .. واحدوا الله
رونالدو: يا عم جاي بواسيه وأقول له كلمتين بعد الماتش لاقيت مصرف زراعي ضرب في وشي
ميسي: بيشمت فيا يا إينيستا إكمني خسران. أنا لولا إنه مصاب كنت مسحت بيه الأرض
رونالدو: تمسح الأرض بمين يا برص إنت؟! طب جرب مد إيدك كدة وأنا أربطك في جاريث بيل وأخليه يعمل بيك فيلم “الأرض” في الاستاد
إينيستا: يادي الفضايح .. يا جماعة عيب كدة دة إنتو لاعيبة كبار والناس إبتدت تتلم والصحافة هاتجرسنا!
رونالدو: اللهم أخزيك يا شيطان .. خلاص يا عم .. هارد لاك يا إينيستا وتصبحوا على خير
ميسي:أيوة كدة .. إجري إلعب تحت بيتكم عشان ماعملهاش معاك
رونالدو: شفت؟! شفت قلة الأدب؟
إينيستا: لأ يا ميسي إنت كدة زودتها قوي! ماتعدي ليلتك دي على خير!
ميسي: مين دة اللي زودها يا أقرع إنت؟! هو أنا هالاقيها منك ولا منه؟
إينيستا: هي حصلت؟! لأ دة إنت إتجننت خلاص وكاس العالم لحس مخك!
رونالدو:صح، هو موضوع كاس العالم دة اللي كتب على جنانه ومخليه مش متمالك أعصابه
ميسي: أيوة يا حيليتها منك له، هو كاس العالم دة اللي هاعرفكم فيه مقامكم.
بس أشوف حد منكم فيه بس. إن شالله حتى أقابلكم صدفة في البرازيل
رونالدو: هاهاهاهاهاها .. يالا يا أهبل، أنا بالعب في البرتغال مش البرازيل
ميسي: …..
إينيستا: …..
رونالدو: ايه مالكم في ايه؟ شفت يا إينيستا، بيقول البرازيل .. هاهاهاها
إينسيتا: لأ قفلتني الحقيقة .. شكله هايبقى كاس عالم إسود علينا كلنا
أليكسيس سانشيز: في ايه ياخوانا إتأخرتم ليه؟ تاتا باعتني أستعوأكم عشان الأتوبيس هايمشي
رونالدو: أليكسيس أليكسيس .. إلحق .. ميسي كل دة فاكرني بالعب معاكم في البرازيل .. هاهاهاها
أليكسيس سانشيز: معانا في البرازيل؟ إنت جيبت كام في الجغرافيا في ثانوية
عامة يابني إنت؟ وبعدين إنتو ايه اللي موقفكم مع الكنغر دة؟!
إينيستا: أنا مش واقف أنا ماشي .. وملعون أبو الأتوبيس اللي هاركب فيه مع أشكالكم دي! أنا هاخد المترو وأغير في الباسك
ميسي: أنا كمان هامشي لاحسن كتر الوقفة بعد الماتش هاتخليني أستهوا
رونالدو: لأ أصل أنا اللي واقع في غرام الأقزام ومش قادر على بعادكم. سلام
يا … كباتن .. أنا هاروح أركب الأوتوبيس أبو دورين وأحتفل بالكاس
أليكسيس سانشيز: لأ بس صحيح هو رونالدو مابيلعبش في البرازيل؟! ميسي رد عليا .. هو رونالدو بيلعب فين؟! ميسي؟ ميسييييييي؟
