Friday, January 24, 2014
Saturday, January 18, 2014
Friday, January 17, 2014
رسالة الى عزيزى الرجل و الشاب المز
عزيزى الرجل والشاب المز
1-البنطلون الـ "low-waist" موضة لكن مش لدرجة إنك تشتريه نمرتين أوسع وتلبسه من غير حزام فنشوف بواسيرك كل ما توطى تجيب حاجة من الأرض.
2-احنا مقدرين ان البوكسر ماركة ودافع دم قلبك فيه لكن دة مش مبرر إنك تفرجهولنا، بلاش طب خاف على .... لا تتحسد ويجيلك ناصور وللا حاجة.
3-صحيح الرجولة مش بالألوان لكن البنطلونات الأحمر والأورنج والفوشيا بتلمح لإنك ممكن تكون لامؤاخذة... محرجة أقولها.
4-البنطلونات الـ skinny أوى ليه؟ انت مش طالع ترقص باليه بحيرة البجع دة غير إنها مضرة للـ... للـ... للمسائل إفهموها بقى، والله الستات بتعانى بعد الجواز.
5-الشنب مش دليل الرجولة، احنا كمان عندنا شنب على فكرة.
6-الذقن المشرشرة اللى واصلة لركبتك، بتدى إحساس أنك مركب ليفة فى وشك، يا تهذبها يا تحلقها لكن ماتحسسناش اننا عايشين فى فيلم أبو لهب، انت فى القرن الواحد والعشرين.
7-الله يخرب بيت اليوم اللى جت لنا فيه موضة الديرتى لوك، طب دول أجانب وبيض وملونين وحلوين، يعنى لما بيعملوها بيفضلوا شكلهم نضيف برضه، لكن إحنا سمر وشعرنا اسود وخلق ما يعلم بيها الا ربنا وكمان نعمل ديرتى لوك.. هى ناقصة؟ شكلك بيبقى عبده أرشيف، كل اللى ناقصك قلم ورا ودنك.
8-شعر صدرك اللى انت فرحان به ومدلدله علينا من قمصانك، شئ مقزز بالنسبة لمعظم الستات وبيفكرنا بأجدادك اللى فى الجبلاية.
9-الكوليهات والحلقان اللى بقيتوا بتلبسوها حلوة الصراحة وكتير ببقى عايزة زيها، منين دى يا أختى؟
10-الحظاظة.. لو كانت بتجيب الحظ ماكانش بقى دة حالكوا، الغوايش الخرز أختك عندها زيهم ابقى استلف منها الألوان اللى مش عندك.
11
-الخواتم الكبيرة، الصراحة أنا من جيل ماكانش بيشوف حد بيلبسها غير المعلمين، تجار الفراخ والمواشى والحشيش في الأفلام. 12-السيرتات اللى بيلم الشعر لورا، خللا بنتى تشاور لى على واحد وتقول "مامى دة لابس توكة زى اللى عندى، ممكن بابا يبقى يستلفها منى" ذنبها ايه البنت تطلع للدنيا وهى فاكرة ان الرجالة بتلبس توك، الله يرحمك يا رجولة.
13-الشعر الطويل موضة عند الأجانب لأنه بينزل لتحت، لكن عندنا بيطلع لفوق وبيخاصم راسك وبيحسسنا إنه اكيد مسكون بقبائل من المخلوقات الزاحفة.
14-الزعبوط الصوف، وظيفته انه يحميك من البرد، حرام تعامله على إنه باروكة ملزوقة فى راسك وتسيبه يزيت وريحته توصل لكوكب المريخ.. طب ممكن تستحمى به عادى.
15-الشراب لو قعد فى رجلك يومين ماتغسلوش، ولع فيه، الغسيل مش هيجيب نتيجة، وعلى فكرة ريحته بتطلع من الجزمة وبنشمها عادى جدا.
16-الإنسان مش بجزمته، انت الوحيد اللى معتقد إن ماركة الجزمة أهم منك شخصيا، بدل ما تجيب جزمة واحدة ماركة غالية وتهرى أمها وتبان انك شاحتها فى الاخر، هات بتمنها كذا جزمة، لان البنت اللى بتقيم الراجل بجزمته، ماتستاهلش غير تنتيفها على دماغها.
17-جاكيت بدلة السهرة مايتلبسش على جزمة كاوتش وجينز ساقط ولا على شورت، يا جدعان محتاجين فصول محو الأمية للملابس العصرية.
18-فى البيت ماتقعدش لمراتك بالفانلة وبنطلون البيجاما وتنتظر إنها تشوفك أحمد عز إنت كدة كبيرك عزوز فخد الجمل فى فيلم "كرش وفانلة وناب".
19-الفانلات الكت مع الشعر تحت الباط وريحة الحلبة لما تكون واكل بسطرمة دى نوع من أنواع تعذيب المعتقلات، كدة مش هتتعرى وتبقى ملفت كدة هتتعر بس.
20-البودى الملزوق على جتتك بغرا علشان لعبت لك فى الجيم كام يوم وعايز تبين العضلتين اللى صرفت عليهم دم قلبك، بيخلينا نشوفك من "عجائب المخلوقات"، فماتعقدش تنفخ فى صدرك كل ما تقابل واحدة عايز ترسم عليها، كلنا عارفين إن العضلات دى وراها "أسترويدز" وأن لو طلعت لك نملة بمطوة إحتمال تبل البنطلون.
21-اللبانة اللى بتمضغها بصوت وانت فاتح بقك دى كلنا شفناها لما كان يوسف شعبان طالع فى دور "سكسكة" لو ترضاها لنفسك.. كمل يابنى وربنا يوفقك
22-الراجل اللى يتحول لصراع ألوان متحرك محتاج إزازة أسيتون، ويبقى ذكرى تعيسة مش أكتر. 23-ظاهرة إنك تحط لنا صورك وإنت بالمايوه وعريان من فوق على الفيسبوك يا عم المغرى معناها الوحيد إنك نفسك مخرج يكتشفك ويديك أدوار نادية الجندى 24-الضفاير.. لو شربت معاها كل البيريل اللى فى العالم الله فى سماه ما هنقتنع انك استرجلت. 25-الجلابية القصيرة على البنطلون، يابنى مكانك مش هنا، البنك الأهلى هيقطع لك تذكرة ويبعتك باكستان، هناك كلهم بينتموا لنفس الكوكب اللى انت جاى منه.
26-السلسلة الكبيرة اللى فيها علامة الدولار والكاب المقلوب دول ستايل ملابس العصابات فى أمريكا، ألاقيهم ليه فى الشارع فى مصر؟؟؟ متأمرك ليه يا سوسو.
27-التاتو عند الأجانب بيبقى فن، إحنا شوهناه وبقى عبارة عن أسامى البنات اللى بنحبها وأشكال غريبة مجهولة الهوية، والورد أحلى وللا الياسمين "التمر حنة"
28-ومبدئيا ماسموش "صويطر" اسمه "sweater" وبتاع المطر مابيتلبسش غير لما الدنيا تمطر لكن فى عز الشمس دة بالظبط زى ما تمشى بشمسية تحت ضوء القمر. 29-الظفر الصغير الطويل، كل الناس عارفة ان الرجالة بتربيه علشان تلعب به فى مناخيرها، كفاية قرف بقى، قصوا ضوافركوا ونضفوها حرام عليكوا يا جدعان، إنتوا ماعندكوش إخوات بنات وللا ايه؟ والله الموفق والمستعان...
.منقول عن أمل محمود
Subscribe to:
Posts (Atom)
LinkWithin
